སྟོན་པ་ཚད་མའི་སྐྱེས་བུ་སྒྲུབ་པའི་ལུགས་འབྱུང་ལྡོག་གི་རྟགས་བརྒྱད།
ལུགས་འབྱུང་ལྡོག་གི་སྦྱོར་བ་བརྒྱད་ཀྱིས་སྟོན་པ་ཚད་མའི་སྐྱེས་བུར་སྒྲུབ་ཚུལ་ཇི་ཡིན་ཞེ་ན།
༡ བཅོམ་ལྡན་འདས་དང་རྒྱུད་གཅིག་ཏུ་གྱུར་བའི་བྱང་སེམས་ཚོགས་ལམ་ཐོབ་མ་ཐག་པ་ཆོས་ཅན། རང་རྒྱུད་ལ་སྟོན་པ་ཞེས་པའི་སྐབས་ནས་དངོས་སུ་བསྟན་པའི་སྟོན་པ་སྦྱོར་བ་ཕུན་ཚོགས་བདག་མེད་རྟོགས་པའི་ཤེས་རབ་འབྱུང་རུང་ཡིན་ཏེ། ཕན་བཞེད་པ་ཞེས་པའི་སྐབས་ནས་དངོས་སུ་བསྟན་པའི་བསམ་པ་ཕུན་ཚོགས་སྙིང་རྗེ་ཆེན་པོ་རྒྱུད་ལ་ལྡན་པའི་བྱང་སེམས་སོ་སྐྱེས་ཡིན་པའི་ཕྱིར། དེ་ཡང་དཔེར་ན། ནད་པ་ནད་ལས་གྲོལ་བར་འདོད་པའི་སྨན་པ་མཁས་པ་གང་ཞིག་གིས་ཐོག་མར་སྨན་གྱི་སྦྱོར་བ་ལ་བརྩོན་པ་བཞིན་ནོ།།
༢ དེ་དང་རྒྱུད་གཅིག་ཏུ་གྱུར་བའི་བྱང་སེམས་མཐོང་ལམ་རྣམ་གྲོལ་ལམ་པ་བ་ཆོས་ཅན། རང་རྒྱུད་ལ་བདེ་གཤེགས་ཞེས་པའི་སྐབས་ནས་དངོས་སུ་བསྟན་པའི་ཁྱད་པར་གསུམ་ལྡན་གྱི་སྤངས་པ་བདེ་གཤེགས་འབྱུང་རུང་ཡིན་ཏེ། གང་ཟག་གི་བདག་མེད་མངོན་སུམ་དུ་རྟོགས་པའི་བྱང་སེམས་ཡིན་པའི་ཕྱིར། དཔེར་ན། ནད་པ་ནད་ལས་གྲོལ་བར་འདོད་པའི་སྨན་པ་མཁས་པས་ནད་པའི་ནད་འཚོ་བར་བྱེད་པ་བཞིན་ནོ། །
༣ དེ་དང་རྒྱུད་གཅིག་པའི་བྱང་སེམས་རྒྱུན་མཐའ་བས་རྣམ་མཁྱེན་སྐད་ཅིག་དང་པོ་ཐོབ་མ་ཐག་པའི་སངས་རྒྱས་འཕགས་པ་ཆོས་ཅན། རང་རྒྱུད་ལ་སྐྱོབ་པ་ཞེས་པའི་སྐབས་ནས་བསྟན་པའི་གཞན་དོན་ཕུན་ཚོགས་འབྱུང་རུང་ཡིན་ཏེ། ཁྱད་པར་གསུམ་ལྡན་གྱི་བདེར་གཤེགས་རྙེད་པའི་སྐྱེས་བུ་ཡིན་པའི་ཕྱིར། དཔེར་ན། ནད་པ་ནད་དང་བྲལ་བར་འདོད་པའི་སྨན་པ་མཁས་པས་ནད་དང་བྲལ་བར་འདོད་པ་བཞིན་ནོ། །
༤ ཐུབ་པ་སངས་རྒྱས་བཅོམ་ལྡན་འདས་ཆོས་ཅན། གྲོལ་བ་དོན་གཉེར་རྣམས་ལ་ཚད་མའི་སྐྱེས་བུར་གྲུབ་སྟེ། གཞན་དོན་ཕུན་ཚོགས་སྐྱོབ་པ་རྒྱུད་ལ་ལྡན་པའི་སྐྱེས་བུ་ཡིན་པའི་ཕྱིར། དཔེར་ན། ནད་པ་ནད་ལས་གྲོལ་བར་འདོད་པའི་སྨན་པ་མཁས་པས་ནད་པའི་ནད་བསལ་ནས་ནད་མེད་པའི་བདེ་བ་ལ་བཀོད་པ་བཞིན་ནོ། །
༥ ཐུབ་པ་སངས་རྒྱས་བཅོམ་ལྡན་འདས་ཆོས་ཅན། རང་གི་རྒྱུར་གྱུར་བའི་གཞན་དོན་ཕུན་ཚོགས་སྤྱོད་པ་སྔོན་དུ་སོང་བ་ཡིན་ཏེ། བདེན་བཞིའི་བླང་དོར་ཕྱིན་ཅི་མ་ལོག་པར་སྟོན་པ་མཐར་ཕྱིན་པའི་སྐྱེས་བུ་ཡིན་པའི་ཕྱིར།
༦ ཐུབ་པ་སངས་རྒྱས་བཅོམ་ལྡན་འདས་ཆོས་ཅན། རང་གི་རྒྱུར་གྱུར་བའི་ཁྱད་པར་གསུམ་ལྡན་གྱི་རྟོགས་པ་ཕུན་ཚོགས་སྔོན་དུ་སོང་བ་ཡིན་ཏེ། གཞན་དོན་ཕུན་ཚོགས་སྐྱོབ་པ་མངའ་བ་མཐར་ཕྱིན་པའི་སྐྱེས་བུ་ཡིན་པའི་ཕྱིར།
༧ ཐུབ་པ་སངས་རྒྱས་བཅོམ་ལྡན་འདས་དང་རྒྱུད་གཅིག་ཏུ་གྱུར་བའི་རྣམ་མཁྱེན་སྐད་ཅིག་དང་པོ་ལ་གནས་པའི་སངས་རྒྱས་འཕགས་པ་ཆོས་ཅན། རང་གི་རྒྱུར་གྱུར་བའི་བདག་མེད་མངོན་སུམ་དུ་རྟོགས་པའི་ཤེས་རབ་སྔོན་དུ་སོང་བ་ཡིན་ཏེ། རྟོགས་པ་ཁྱད་པར་གསུམ་ལྡན་གྱི་བདེར་གཤེགས་རྙེད་པའི་སྐྱེས་བུ་ཡིན་པའི་ཕྱིར།
༨ དེ་དང་རྒྱུད་གཅིག་ཏུ་གྱུར་བའི་བྱང་སེམས་མཐོང་ལམ་བར་ཆད་མེད་ལམ་པ་ཆོས་ཅན། རང་གི་རྒྱུར་གྱུར་བའི་བརྩེ་བ་སྙིང་རྗེ་ཆེན་པོ་སྔོན་དུ་སོང་བ་ཡིན་ཏེ། བདག་མེད་མངོན་སུམ་དུ་རྟོགས་པའི་བྱང་སེམས་ཡིན་པའི་ཕྱིར།
དེ་ལྟར་དང་པོ་བཞི་ནི་ལུགས་འབྱུང་གི་སྦྱོར་བ་དང༌། ཕྱི་མ་བཞི་ནི་ལུགས་ལྡོག་གི་སྦྱོར་བ་ཡིན་ཞིང༌། དེ་ཡང་ལུགས་འབྱུང་ལྡོག་གི་གོ་དོན་ནི། ཚད་མར་གྱུར་བ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཞེས་ཀུན་བཏུས་ཀྱི་མཆོད་བརྗོད་འདིའི་སྐབས་ཀྱི་དོན་ལྔ་སྟེ། ཚད་མར་གྱུར་བ། འགྲོ་ལ་ཕན་པ། སྟོན་པ། བདེ་གཤེགས། སྐྱོབ་པ་བཅས་ཀྱི་དང་པོ་ནི་བསྒྲུབ་བྱ་དང་ལྷག་མ་བཞི་སྒྲུབ་བྱེད་ལ་སྦྱར་ཏེ། མཆོད་བརྗོད་དེའི་གོ་རིམ་དང་མཐུན་པར་འགྲོ་ལ་ཕན་པའི་རྟགས་ཀྱིས་སྟོན་པ་དང༌། སྟོན་པའི་རྟགས་ཀྱིས་བདེ་གཤེགས། བདེ་གཤེགས་ཀྱི་རྟགས་ཀྱིས་སྐྱོབ་པ་སྒྲུབ། སྐྱོབ་པའི་རྟགས་ཀྱིས་སྟོན་པ་ཚད་མའི་སྐྱེས་བུར་སྒྲུབ་བཞིན་ཡོད་པའི་རྟགས་སྦྱོར་ཁག་ལ་ལུགས་འབྱུང་དང༌། བདེན་བཞིའི་བླང་དོར་ཕྱིན་ཅི་མ་ལོག་པར་སྟོན་པ་མཐར་ཕྱིན་པའི་སྐྱེས་བུའི་རྟགས་ལས་སྐྱོབ་པ། སྐྱོབ་པའི་རྟགས་ལས་བདེ་གཤེགས། བདེ་གཤེགས་ཀྱི་རྟགས་ལས་སྟོན་པ། སྟོན་པའི་རྟགས་ལས་འགྲོ་ལ་ཕན་པ་སྒྲུབ་པས་སྔ་མའི་གོ་རིམ་ལས་ལྡོག་ཡོད་སྟབས། ལུགས་ལྡོག་གི་སྦྱོར་བ་ཟེར་བར་སྣང༌།
Comments
Post a Comment